हॅकिंगवरचं पहिलंवहिलं ई-मॅग – क्लब हॅक

02 Apr 2010 १ प्रतिक्रिया

by अमोल in पेप्रातला मी! Tags: पेप्रातला मी!

कंप्युटर व्हायरस हा असा प्रकार आहे, की ज्याचं नाव घेताच आपली सिस्टिमही हँग होईल. इंटरनेटचा स्पीड वाढतोय, कंप्युटर, लॅपटॉपसह मोबाईलवरुन अॅक्सेसॅबिलिटी वाढतेय, तसा हॅकिगचा धोकाही वाढतोच आहे. नुकतंच चीनमध्ये हॅकर्सनी गूगलच्या साईटचं हॅकिग प्रकरण यासंदर्भात ताजंच आहे. पण, सुदैवाने व्हायरसमध्येही रस घेणारी मंडळी आहेत, जी सतत विविध प्रकारच्या ऑनलाईन आक्रमणांपासून आपल्यासारख्यांना वाचवण्यासाठी हॅकिगचे कौशल्य वापरत असतात. व्हायरस अथवा स्पायवेअर तयार करुन महत्त्वाची माहिती चोरणे, अकाउंटस हॅक करणे, माहितीचा गैरवारप करणे, असे गैरप्रकार करणाऱ्या हॅकर्सना शह देण्यासाठी काट्यानं काटा काढावा, या तत्वावर काम करणारे हॅकर्स म्हणजे एथिकल हॅकर्स. तर अशा भारतातील एथिकल हॅकर्सचा क्लब पुण्यात आहे, क्लब हॅक त्याचं नाव. या क्लब हॅकने नुकतंच हॅकिग आणि सायबर सिक्युरिटी या विषयाला वाहिलेलं ई-मॅगझिन सुरु केलं आहे. विशेष म्हणजे हॅकिग या विषयाला वाहिलेलं भारतातील हे पहिलंच ई-मॅगझिन आहे.
स्वत: सायबर सुरक्षा तज्ज्ञ असलेल्या रोहित श्रीवास्तव या तरुणाने क्लब हॅकची स्थापना केली. क्लब हॅकतर्फे २००७ पासून दरवर्षी डिसेंबरमध्ये पुण्यात हॅकर्सचं संमेलनही भरविण्यात येतं, जेथे हजेरी लावण्यासाठी फक्त भारतातूनच नव्हे, तर परदेशातूनही हॅकर्स आवर्जून येतात. अशा प्रकारचं भारतातील हे एकमेव संमेलन आहे. संगणक वापरणाऱ्या सामान्य माणसांमध्ये संगणक सुरक्षेविषयी प्रबोधन करण्याच्या हेतुने क्लब हॅकची स्थापना विना फायदा तत्वावर करण्यात आली आहे. सायबर गुन्हे सोडविण्यासाठी क्लब हॅकने पोलिसांशीही सहकार्य केले असून, तपासात तांत्तिक मदत देण्यासाठी आणि सायबर गुन्हेगारी बाबत जागृती करण्यासाठीही सहकार्य केले जाते. क्लब हॅकचं स्वरूप हे ओपन कम्युनिटी सारखं आहे. देशभरात त्याचे सदस्य असून ते विविध क्षेत्रांत कार्यरत आहेत, ज्यात पोलिस अधिकारी, सायबर वकील, हॅकर्स, विविध टेक्नॉलॉजी कम्युनिटीजचे सदस्य तसेच विद्यार्थीही आहेत.
एथिकल हॅकिग या विषयाला वाहिलेलं मॅगझीन असावं अशी आमची सर्वांची खूप दिवसांपासून इच्छा होती आणि कोणीतरी पुढे येवून ते सुरु करेल, अशी आम्ही वाट पाहत होतो. मात्र, मधल्या काळात तशी चिन्हं न दिसल्याने आम्हीच ते काढण्याचा निर्णय घेतला, रोहित सांगतो. हे ई-मॅगझिन आहे आणि त्याचे स्वरून कम्युनिटी मॅगझिन सारखं आहे. क्लबहॅक मॅगच्या साईटवर जावून कोणीही ते मोफत डाउनलोड करु शकतो. स्वत: रोहित, वरुण हिरवे, अभिजित पाटील, पंकित, दीपरंजन मोरे, आर्या भट्टाचार्य, अभिषेक नागर ही टीम सध्या क्लबहॅक मॅगचं काम सांभाळते आहे. फेब्रुवारी महिन्याचा अंक हा क्लब हॅक मॅगचा पहिला अंक होता, आणि आतापर्यंत, म्हणजे उण्यापुऱ्या पंधरा दिवसांतच त्याला २००० हून अधिक वाचकांनी भेट दिली असून ४०० हून अधिक वाचकांनी डाउनलोड केलं आहे.
क्लब हॅक मॅग अजून बाल्यावस्थेत असून, वाचकांच्या प्रतिसादावर त्याची पुढील दिशा ठरेल, असं रोहित म्हणतो. मात्र, पंधरा दिवसांत मिळालेला प्रतिसाद पाहता क्लबहॅक मॅगचं भवितव्य उज्ज्वल आहे हे सांगायला कुणा सायबर एक्सपर्टची गरज नाही.

हॅकिग शिकायचंय..?
हॅकेंगचे कोर्सेस पुण्यातही उपलब्ध आहेत. पुण्यात डेटा ६४ या संस्थेतर्फे हे कोर्सेस चालवले जातात. पुणे विदयापीठातील सायन्स अॅण्ड टेक्नॉलॉजी पार्कमध्ये ही संस्था आहे. हॅकिग कोणालाही शिकता येते. अर्थात संगणकाचं मुलभूत ज्ञान असणं आवश्यक आहे. शिकण्याची आवड हवी आणि त्याचा योग्य वापर करण्याचं बंधन स्वत:वर घालून घ्यायला हवं.

पूर्वप्रसिद्धी – लोकमत, ऑक्सिजन पुरवणी – दि.२६ फेब्रुवारी २०१०